Весна Љ.
Рекордно порибување по четиригодишна пауза
Министерот за земјоделство, шумарство и водостопанство, Борче Серафимовски, при посетата на Хидробиолошкиот завод информираше дека во август и септември езерото било порибено со вкупно 6,5 тони подмладок – количина што е за 1,6 тони поголема од првично планираната. Покрај денешните 100.000 единки, претходно била внесена и посебна група од 100.000 поголеми пастрмки за да се надомести пропуштеното од паузата во вештачкиот мрест помеѓу 2019 и 2023 година.
-
La Linea v23
699 ден
524.25 ден
Директорката на Заводот, д-р Орхидеја Тасевска, истакна дека годинава успешно биле собрани и одгледувани 1,4 милиони зрна икра. Сепак, таа предупреди дека поради долгогодишниот прекин на мрестот, неопходни се сериозни истражувања пред да се излезе со конкретни бројки за реалната состојба на рибниот фонд.
Рибокрадците сè поприсутни, потребни се законски измени
Паралелно со напорите за обновување на видот, продолжува битката со нелегалниот риболов. Директорот на Државниот инспекторат за земјоделство, Ивица Ангеловски, посочи дека годинава се спроведени 231 инспекциски надзор на езерото, при што се издадени 21 платен налог (четири на правни и 17 на физички лица). Тој појасни дека со новите законски измени, Инспекторатот веќе нема надлежност за контрола на рибата во угостителските објекти.
„Инспекторатот е само една алка во целокупниот синџир. Мора да се работи на подобрување на законската регулатива, односно на измена на прекршочните одредби, за да создадеме вистински услови за заштита на езерото од рибокрадците кои се сè почесто присутни“, дециден е Ангеловски.
Асистиран транспорт за спас на јагулата
Освен за пастрмката, надлежните најавуваат мерки и за критично загрозената јагула. Владата усвои Национален план кој предвидува 40 проценти од годишната квота за улов на замката „Далјан“ кај Струга да бидат транспортирани директно кон морската средина. Овој „асистиран транспорт“ треба да им овозможи на сребрените јагули безбедно да го продолжат патот кон Саргасовото Море, избегнувајќи ги смртоносните турбини на хидроцентралите по текот на реката Црн Дрим.
