Потврдено од МВР: Пронајдено е изгорено тело во пожарот во Ѓорче Петров

Вчерашните пожари ја земаа својата прва жртва.

Оваа трагична информација ја објави порталот „Скопје1“. Тие се повикуваат на официјална потврда од Министерството за внатрешни работи. Според нивните извори, човечко тело е најдено изгорено во штала која беше зафатена од пожарот.

Шталата била лоцирана во близина на Железничката станица во Ѓорче Петров. Телото на човекот било пронајдено до изгорените тела на добитокот кој се наоѓал внатре. Просториите биле целосно пеплосани од огнената стихија.

Од страна на МВР се преземаат мерки за целосно расчистување на случајот. Ќе се работи на идентификација на жртвата и на утврдување на причините за пожарот. Ова е прва жртва од пожарите кои деновиве беснеат низ земјава.