Трамп и Нетанјаху на иста маса: Нов напад врз Иран останува опција

Американскиот претседател Доналд Трамп и израелскиот премиер Бенјамин Нетанјаху во Белата куќа разговарале за идните чекори кон Иран и начините за запирање на неговата нуклеарна програма.

Според висок израелски функционер, биле разгледани дипломатско решение, продолжување на економскиот притисок и нов воен удар од големи размери. Нетанјаху, сепак, не побарал воената опција да добие предност пред останатите сценарија.

Конечната одлука останува кај Трамп

„На крајот, тоа е негова одлука“, изјавил функционерот, посочувајќи дека американскиот претседател ќе го избере следниот потег на Вашингтон.

На средбата било разговарано и за продолжување на дипломатските контакти, додека Нетанјаху ја препуштил водечката улога на Трамп во одредувањето на понатамошната стратегија кон Техеран.

Економската криза во Иран како дополнителен притисок

Израелскиот функционер оценил дека иранското раководство е под сè поголем притисок поради инфлацијата и незадоволството на граѓаните.

Сепак, секоја нова ескалација може да предизвика сериозни последици за светската економија, особено за цените на нафтата и транспортот низ Ормутскиот Теснец.

Цените на енергенсите веќе реагираа на ширењето на конфликтот и заканите за клучните поморски патишта во регионот.

Нов бран американски напади врз Иран

Средбата во Вашингтон се одржа во момент на силна воена ескалација. Американската војска потврди дека извршила нов двочасовен бран воздушни напади врз десетици цели на Иранската револуционерна гарда.

Меѓу погодените цели биле командни центри, ракетни и беспилотни капацитети, како и системи за поморска одбрана и надзор. Нападите следувале по иранското лансирање балистички ракети кон американски сили во регионот.

Конфликтот се проширува низ регионот

САД и Саудиска Арабија извршија и напади врз групи поддржани од Иран во Ирак, додека Техеран потврди дека ги таргетирал американските позиции во Јордан.

Иранските власти продолжуваат да го отфрлаат предложеното решение за Ормутскиот Теснец, а Трамп најави силен одговор на нападите врз американските војници.

Додека дипломатијата формално останува една од опциите, можноста за нов голем напад врз Иран повеќе не е исклучена.