Трендафилов ги повика сите на улица: Денеска работниците зборуваат, а владата мора конечно да ги слушне

Претседателот на Сојузот на синдикати на Македонија, Слободан Трендафилов, утрово упати драматичен повик до сите работници масовно да излезат на улица и да се приклучат на денешниот голем протест за повисоки плати.

Во пресрет на собирот закажан за попладнево, првиот синдикалец во изјава за медиумите порача дека времето на чекање заврши и дека денеска „работниците зборуваат“. Тој директно ја прозва Владата, обвинувајќи ја дека цела година ги игнорира барањата за достоинствен живот во, како што рече, „најсиромашната држава“.

„Ги повикувам работниците да покажеме слога, да застанеме рамо до рамо во борбата за поголеми плати. Почнуваме од домот на работници и завршуваме пред Владата која одбива да ги зголеми работничките примања“, изјави Трендафилов.

Маршута на протестот: Блокада на центарот од 17 часот

Протестниот марш започнува точно во 17:00 часот пред зградата на ССМ. Работниците ќе се движат кон Собранието, потоа ќе застанат пред Сојузот на стопански комори, а финалниот собир и читањето на барањата ќе се случат пред зградата на Владата на Република Македонија.