Формула студент: Македонски студенти го претставија новиот тркачки болид!

Настанот се одржа во амфитеатарот на Машинскиот факултет во Скопје, каде тимот ги презентираше резултатите од изминатата сезона и напорниот процес на работа. Како круна на презентацијата, присутните имаа можност да проследат и демонстративно возење на новиот болид, кој е целосно развиен од македонските студенти. На промоцијата присуствуваше и министерката за енергетика, рударство и минерални суровини, која изрази силна поддршка за овие млади иноватори.

Младите се сегашниот потенцијал на државата

Министерката Божиновска потенцираше дека ваквите проекти се најдобриот доказ за потенцијалот кој го поседува Македонија. Таа нагласи дека инвестицијата во науката и техничкото знаење е директна инвестиција во македонската економија, бидејќи токму вакви кадри се неопходни за технолошки напредок. „Не смееме да дозволиме талентот да остане само потенцијал – треба да создадеме услови тој да се претвори во резултат“, порача министерката, ветувајќи институционална поддршка.

„Овој болид не е само технички производ, тој е резултат на знаење, тимска работа, посветеност и многу часови вложен труд на овие млади луѓе.“

Прв и единствен македонски Формула студент тим

„MES Racing“ е првиот и единствен македонски Формула студент тим кој континуирано ја претставува државата на престижни меѓународни натпревари. Особено значајно е што на развојот на болидот заеднички работат студенти од различни области, спојувајќи го своето знаење од машинството и електротехниката во еден вистински инженерски тим. За досегашната институционална соработка, тимот ѝ врачи специјална благодарница на министерката Божиновска, која возврати со порака младите да продолжат да ги поместуваат границите на успехот.