3720 денари за една порција риба: Сметката од Охрид што ја разбранува цела Македонија!

Во екот на летната туристичка сезона, кога Охрид традиционално е преполн со домашни и странски гости, една обична фискална сметка успеа да предизвика вистинска лавина реакции на социјалните мрежи и повторно да ја актуелизира долго присутната дебата за високите цени во овој град. Причината е износот што многумина го оценија како преоптоварувачки — порција пастрмка од 600 грама наплатена по цена од дури 3720 денари, што кај јавноста разбуди бран огорченост и коментари.

Спорната сметка ја објави Ѓорѓи Галетановски – Чомбе, поранешен директор на Зоолошката градина во Скопје и долгогодишен член на СДСМ, кој со доза иронија ги проследи охридските цени во својата објава. Неговиот коментар, во кој на сатиричен начин го предвиде иднината на градскиот туризам, брзо се рашири и стана повод за бројни дискусии меѓу граѓаните.

620 денари за 100 грама подготвена риба

Според фотографијата од фискалната сметка, производот бил евидентиран како „пастрмка на охридски начин“, при што количината изнесувала 0,6 килограми, а цената била пресметана по 6200 денари за килограм, што довело до крајниот износ од 3720 денари, а сметката била издадена на 30 јули 2026 година во 12:59 часот. Тоа во пракса значи дека само 100 грама подготвена риба биле наплатени по 620 денари, при што цената за порцијата не била однапред фиксна, туку зависела директно од тежината на избраната риба.

„Ги корегираа цените и одма фул Охрид. Наредно лето ни децава од Скопје нема да ви одат, ќе седат само Холанѓани дедовци и баби“, напиша Галетановски.

Оваа објава набрзо предизвика низа реакции кај граѓаните, кои повторно ја отворија темата за цените во Охрид во текот на сезоната и за нивното влијание врз домашните гости, при што вреди да се напомене дека ова не е првпат посетителите да реагираат на високите цени за храна и пијалаци во градот. Според дел од коментарите на социјалните мрежи, пица во централното градско подрачје често се продава по цени над 800 денари, додека кафето во одредени локали може да достигне и до 220 денари, што дополнително ја разгоре расправата. Некои граѓани дури повлекоа и споредби со познати и далеку поскапи европски дестинации како Дубровник, Монако и Азурниот брег, посочувајќи дека охридските цени во определени случаи опасно им се приближуваат, што повторно го отвори прашањето дали високите сезонски цени би можеле да влијаат врз изборот на домашните туристи и врз идниот развој на туризмот во градот.