Од сон за убавина до кошмар: како 50-годишната Милена починала во Турција

По дваесет дена поминати на одделот за интензивна нега во болница во Истанбул, почина Милена Манчини, 50-годишна италијанска претприемачка која беше хоспитализирана по естетска операција на која беше подложена во Турција.

Според засега непотврдени информации од здравствени извори, за време на зафатот за липосукција дошло до случајна повреда (перфорација) на желудникот, од која таа повеќе не успеала да се опорави.

Трагедијата го потресе гратчето Изола дел Лири во Италија, каде што Милена била позната и ценета во деловните кругови. Таа потекнувала од угледно семејство – нејзиниот татко бил познат индустријалец, а нејзината сестра Рита е познат биолог и професор на Универзитетот Ла Сапиенца во Рим.

Од операција до борба за живот

Милена отпатувала во Истанбул за да изврши зафат за липосукција во една приватна клиника, но операцијата се претворила во трагедија. Поради компликации, таа веднаш по зафатот била префрлена на одделот за интензивна нега во универзитетската болница во Истанбул, каде што поминала дваесет дена борејќи се за живот, но залудно.

Повеќе од само трагедија – предупредување за медицинскиот туризам

Зад себе таа остави партнер и две ќерки. Смртта на Милена Манчини предизвика огромна тага во нејзиниот роден крај, каде што ја опишуваат како претприемчива, ведра и омилена личност. Овој трагичен случај уште еднаш ја отвора дебатата за ризиците од естетскиот туризам, кој, иако поевтин, понекогаш завршува со кобни последици.