Маск ја „исклучи“ моторната пила: Згасна контроверзниот оддел DOGE!

Одделот за владина ефикасност (DOGE) на американскиот претседател Доналд Трамп е распуштен осум месеци пред истекот на неговиот мандат.

Оваа иницијатива, која беше симбол на ветувањето на Трамп за намалување на администрацијата и првично предводена од Илон Маск, веќе не постои како централизиран ентитет. Директорот на Канцеларијата за управување со персонал (ОПМ), Скот Купор, за „Ројтерс“ потврди дека функциите се преземени од неговата канцеларија, изјавувајќи кратко: „Тоа не постои“.

Од „моторна пила“ до разубавување веб-страници

Илон Маск, кој своевремено на бините мавташе со моторна пила како симбол за „сечење“ на бирократијата, сега е надвор од оваа приказна. Дел од истакнатите вработени во DOGE се префрлени во новоформираното Национално студио за дизајн, предводено од ко-основачот на „Airbnb“, Џо Гебија, со задача да ги разубавуваат владините веб-страници.

Иако DOGE тврдеше дека скратил десетици милијарди долари трошоци, критичарите и финансиските експерти истакнуваат дека е невозможно да се потврдат овие бројки бидејќи одделот никогаш не обезбедил детално јавно сметководство за својата работа.