Сензација во светот на животните: Волк снимен како користи „алат“ за да дојде до храна!

Кога волк во дивината ќе наиде на потенцијален оброк, обично го водат инстинктите, но истражувачите во западна Канада забележаа зачудувачко однесување кое ја менува нашата перцепција за овие предатори.

Снимката направена во Британска Колумбија прикажува волчица која, во потрага по храна, прави неколку пресметани потези за да извлече стапица за ракови од длабока вода. Според истражувачите, ова е „првата позната потенцијална употреба на алат кај дивите волци“.

„Не им верував на своите очи кога ја гледавме снимката“, вели Кајл Артел, биолог од Државниот универзитет во Њујорк.

Мистеријата на исчезнатите мамки

До откритието, детално опишано во списанието „Екологија и еволуција“, дошло случајно. Истражувачите поставиле стапици за инвазивни европски зелени ракови во длабока вода. Тие забележале дека некој ги извлекува стапиците на брегот и ги јаде мамките. Бидејќи стапиците никогаш не биле на суво (дури ни за време на осека), претпоставувале дека се работи за некој воден ѕвер.

Интелигенција, а не само инстинкт

Камерите поставени во мај 2024 година ја решиле мистеријата: на снимката се појавила волчица која плива, ја фаќа бовата прикачена за стапицата и го влече јажето (најлонот) кон брегот. Откако ја извлекла стапицата на суво, таа ја прегризала мрежата за да дојде до храната.

Биолозите истакнуваат дека ова не било агресивно јурење по храна, туку „внимателно кореографирана секвенца“. Волчицата сфатила дека бовата е поврзана со стапицата и дека ако ја повлече, ќе добие награда. Ова укажува на високо ниво на софистицираност и учење преку обиди и грешки.