Директор и службеник од Делчево го оштетиле ЈКП „Брегалница“ за 120.000 евра

Директор и раководител во Јавното комунално претпријатие „Брегалница“ – Делчево заработија кривични пријави под сомнение дека го оштетиле претпријатието за над 120.000 евра.

Управата за финансиска полиција поднесе пријава до ОЈО против С.С. и М.К. поради „несовесно работење во службата“. Според истрагата, во периодот од 2019 до 2023 година, директорот С.С. не дал налог за тужење на граѓани и фирми за неплатена вода, смет и закуп, со што дозволил долговите да застарат и да станат ненаплатливи.

Второпријавениот М.К., како раководител на секторот за правни и финансиски работи, се товари дека не воспоставил систем за контрола и не доставувал предлози за присилна наплата. Со ваквото непостапување, на Буџетот на претпријатието му е нанесена штета од вкупно 7.588.894 денари.