Ужас во Франција: Експлозија на гас уби две дечиња, братче и сестриче

Две дечиња на возраст од три и пет години загинаа, а повеќе лица се повредени во силна експлозија што се случи во станбена зграда во градот Треву, во францускиот департман Ен.

Според локалните власти, трагедијата се случила околу 17:30 часот во четирикатница, при што братчето и сестричето починале и покрај обидите за реанимација на екипите на брзата помош, додека нивната мајка и најстарото дете кои биле во станот успеале да преживеат.

Градоначалникот Марк Пешу потврди дека според првичните информации, причината за несреќата најверојатно е експлозија на гас. Од зградата се евакуирани околу 30 станари, од кои многумина биле во состојба на шок. Експлозијата предизвикала значителна материјална штета, ослабувајќи ја конструкцијата на објектот и оштетувајќи две блиски училишта, за чии ученици е обезбедена психолошка поддршка.