Весна Љ.
ССМ најави дека утре, 10 февруари 2026 во 9:00 часот, ќе го блокира просторот околу Собранието, барајќи минимална плата од 600 евра и зголемување од 100 евра за сите останати плати.
Сојузот на синдикатите на Македонија денес повторно ги повика работниците на протест со блокада на Собранието, со порака дека една година нема реакција од пратениците на нивниот предлог за раст на минималната плата. Според најавата, ќе се блокираат булеварот „11 Октомври“ и улицата „Даме Груев“, по кои пратениците обично пристигнуваат со автомобили. ССМ најави дека ќе бидат пропуштани само возила на Итната медицинска помош, Противпожарната бригада и полицијата.
-
Хемија
699 ден
524.25 ден
ССМ бара минималната плата веднаш да се зголеми на 600 евра, а останатите плати да се зголемат за најмалку 6.000 денари или за разликата меѓу сегашната и новата минимална плата. Во повикот синдикатот посочува дека пратениците, според нив, „уживаат во луксуз“ со високи и дополнително планирани зголемувања на платите, при што нагласуваат дека „најмалку 250 евра за пратениците, а ни 25 евра за работниците е срамно“.
Блокадата е притисок преку симболика, но и преку практична порака за привилегиите
Синдикатот дополнително потенцира дека пратениците имаат пристап до собраниско бифе по ниски цени и патни трошоци, додека слични права за храна и превоз, според ССМ, не се уредени за работниците. Пораката на блокадата е јасна: ако функционерите можат да наплатуваат патни трошоци што надминуваат и 100 евра за еден ден, тогаш треба да има политичка волја и за системско подобрување на работничкиот стандард.
ССМ најавува дека ако продолжи молкот, ќе почне собирање 10.000 потписи за намалување на функционерските плати и зголемување на работничките. Синдикатот им се извини на граѓаните за отежнатото движење во периодот на блокадата и нагласи дека секој итен случај ќе биде пропуштен.
