Кристоферсен алармира: Русија може да „грабне“ норвешка територија за да ги штити нуклеарните бази

Норвешка не ја исклучува можноста во иднина да се соочи со руска воена акција, предупреди началникот на Генералштабот Ерик Кристоферсен, ставајќи го фокусот на Кола и нуклеарниот капацитет на далечниот север.

Во интервју за „Гардијан“, Кристоферсен посочи дека Осло не смета оти Русија има класични освојувачки цели кон Норвешка како кон Украина или поранешни советски територии. Сепак, тој вели дека сценариото што го следат е ограничена акција за „грабнување“ територија, во рамки на обид Москва да ги заштити своите нуклеарни капацитети што ги смета за клучни во поширок конфликт.

Кола како „јадро“ на ризикот, НАТО сценаријата се пишуваат на север

Кристоферсен нагласи дека голем дел од рускиот нуклеарен арсенал е концентриран на полуостровот Кола, во непосредна близина на норвешката граница. Таму, според него, се распоредени нуклеарни подморници, копнени ракети и авиони способни да носат нуклеарно оружје, што би било пресудно ако дојде до поширока ескалација меѓу Русија и НАТО. „Тоа е сценариото за кое се подготвуваме на далечниот север“, порача тој.

Хибридни закани, директна линија и Свалбард како тест за довербата

Иако Норвешка ја разгледува и можноста за класична инвазија, Кристоферсен вели дека во моментот најмногу ги следат хибридните закани, како саботажи и електронско блокирање. Тој додаде дека Осло и Москва сè уште одржуваат ограничени контакти, особено за пребарување и спасување во Баренцовото Море, и дека има редовни средби на воени претставници на границата. Како мерка за избегнување недоразбирања, тој поддржа идеја за директна воена телефонска линија меѓу двата главни града, а за Свалбард оцени дека Русија го почитува договорот од 1920 што ја забранува милитаризацијата, додека тврдењата за „тајна милитаризација“ ги нарече пропаганда. Осврнувајќи се и на изјавите на Доналд Трамп за наводни планови околу Гренланд, Кристоферсен ги оцени како „многу чудни“ и рече дека норвешките служби немаат такви сознанија, додавајќи дека руската активност на Арктикот е насочена повеќе кон Атлантскиот Океан, а не кон Гренланд