Трагедија во Минас Жераис, 46 жртви по обилните дождови

Бројот на загинати по поројните дождови во сојузната држава Минас Жераис во Бразил се искачи на 46, соопшти државната противпожарна служба

Поплавите и лизгањето на земјиштето погодија повеќе градови, меѓу кои Жуиз де Фора и Уба, при што околу 3.600 лица биле принудени да ги напуштат своите домови. Според официјалните податоци, 21 лице сè уште се води како исчезнато.

Интензивна дождовна сезона

Во голем дел од Бразил, периодот од декември до март е познат по силни врнежи, грмотевици и свлечишта. Сепак, локалните власти посочуваат дека годинава врнежите биле исклучително интензивни.

Рекордни врнежи во февруари

Општинските власти во Жуиз де Фора информираа дека ова бил најврнежливиот февруари во историјата на градот. Количината на дожд била повеќе од двојно поголема од просечната за овој месец, што дополнително ги влошило последиците од природната катастрофа.