ТАЈНА ОПЕРАЦИЈА ВО ТЕХЕРАН: Како беше елиминиран Хамнеи

Темпираниот напад врз безбедносен состанок во Техеран бил клучниот момент во операцијата во која загина ајатолахот Али Хамнеи

Според американски извори запознаени со операцијата, САД и Израел го усогласиле времето на нападот со состанок меѓу врховниот лидер и неговите најблиски соработници. Двајца ирански извори изјавиле дека Хамнеи свикал средба на безбедна локација, на која присуствувале високи функционери од Советот за национална безбедност и од Корпусот на Исламската револуционерна гарда.

Разузнавачки сигнал за напад

Американски претставници навеле дека потврдата за одржувањето на состанокот била сигнал за започнување на операцијата. Според нив, целта била прво да се елиминира Хамнеи за да се спречи можноста за бегство или преместување. Израелските разузнавачки служби наводно откриле промена во терминот на средбата, што довело до одложување на почетокот на нападот.

Комплексот поврзан со врховниот лидер бил погоден во раната фаза од операцијата, а сателитски снимки што ги анализирале медиуми покажале значителни оштетувања.

Американскиот претседател Доналд Трамп на својата платформа објави дека операцијата се потпирала на „високо софистицирани системи за надзор“ и блиска координација со Израел. Засега нема независна потврда од иранските власти за сите детали поврзани со настанот.