Николоски со говор во Светска банка во Вашингтон

Николоски во Вашингтон: говор во Светска банка и средби во Стејт департментот

Заменик претседателот на Владата и министер за транспорт Александар Николоски во наредните три дена престојува во Вашингтон, каде што ќе има работни средби во Светска банка и во Стејт департментот. Посетата е фокусирана на инфраструктурната соработка и економското партнерство меѓу Македонија и Соединетите Американски Држави.

Николоски ќе учествува на годишниот меѓународен форум „Transforming Transportation 2026“, каде што е поканет како еден од главните говорници.

Обраќање за стратешките транспортни коридори

На главната пленарна сесија, Николоски ќе има обраќање заедно со еврокомесарот Апостолис Цицикостас. Темата на неговото излагање е „Коридори за одржливо поврзување“, при што ќе се зборува за значењето на пан-европските транспортни коридори во Македонија.

Во фокус ќе бидат инфраструктурните проекти што ги реализира Владата, особено изградбата на нови автопатски делници, како и плановите за брза железничка пруга на Коридорот 10 и железничкото поврзување со Бугарија преку Коридорот 8.

Средби со Светска банка

За време на посетата се планирани и средби со раководството на Светска банка, каде што ќе се разговара за тековните и идните инфраструктурни проекти што Македонија ги реализира во партнерство со Банката.

Очекувањата се разговорите да бидат насочени кон можностите за нови инвестиции и финансиска поддршка за транспортниот сектор.

Контакти во Стејт департментот

Покрај економските теми, Николоски ќе има и средби со високи претставници во Стејт департментот. На агендата се прашања поврзани со економската соработка, инвестициите и партнерството меѓу Македонија и САД.

Во рамки на посетата се предвидени и разговори со претставници на Републиканската партија, како дел од дипломатските и политичките контакти во Вашингтон.