ЕКСКЛУЗИВНО: Моџтаба Хамнеи тајно опериран во Москва под заштита на Путин?

Мистеријата околу судбината на новиот ирански врховен лидер, Моџтаба Хамнеи, добива нови драматични размери со информациите дека тој е тајно префрлен на лекување во Москва. Според извори на кувајтскиот весник „Ал Џарида“, во операција обвиена во строга тајност, Хамнеи со руски воен авион бил транспортиран во претседателски комплекс во Русија. Овој потег доаѓа откако повредите здобиени во бомбардирањата на 28 февруари се покажале како премногу сериозни за да се санираат во Иран, каде безбедноста на лидерот веќе не може да биде загарантирана под постојаниот дожд од израелски и американски ракети.

Понуда од Путин: Кремљ како последно засолниште?

Информациите укажуваат дека лично рускиот претседател Владимир Путин предложил Хамнеи да се лекува во Русија за време на телефонскиот разговор со иранскиот претседател минатиот четврток. Причината за овој екстремен чекор е стравот дека израелските служби би можеле да ја лоцираат позицијата на лидерот преку следење на медицинскиот персонал во Иран. Во Москва, Моџтаба наводно веќе бил подложен на „успешна операција“ извршена од тим врвни руски и ирански лекари, додека официјален Техеран сè уште молчи и не објавува никаква визуелна потврда за неговата состојба.

Лажен говор и сомнежи кај реформистите

Додека Моџтаба е во Русија, во Иран растат сомнежите за неговата способност да владее. Извори блиски до иранските реформисти тврдат дека првиот говор на новиот лидер всушност е дело на Али Лариџани, бидејќи содржината премногу наликува на неговите претходни изјави. Фактот што нема ниту аудио-снимака, ниту видео-обраќање, ги подгрева шпекулациите дека Хамнеи помладиот е можеби премногу тешко повреден за воопшто да го видел говорот кој му се припишува, оставајќи го иранскиот режим во сериозна криза на легитимитет.

Нетанјаху: „Нема да му дадам животно осигурување“

Од друга страна, Израел не ги демантира информациите дека знае точно каде се наоѓа нивната главна мета. Премиерот Бенјамин Нетанјаху беше брутално директен на последната прес-конференција, порачувајќи дека нема да открие информации за здравјето на Хамнеи, но нагласи: „Нема да му дадам животно осигурување“. Израелското разузнавање верува дека повредите на левата страна од телото, здобиени при падот на рушевини врз неговата канцеларија во Техеран, се многу посериозни отколку што режимот сака да признае, што го објаснува паничното бегство кон Москва.

Битка за опстанок на иранската „глава“

Дали префрлањето во Русија е само привремен медицински третман или пак вовед во долготраен егзил на иранското раководство? Додека иранската Револуционерна гарда се обидува да ја задржи кохезијата во земјата, отсуството на врховниот лидер создава опасен вакуум. Доколку Моџтаба Хамнеи не се појави наскоро со убедлив доказ дека е жив и способен за работа, стабилноста на Иран ќе биде на најголем тест досега, додека „непријателот“ чека на неговиот следен потег.