Ноќ на удари низ Украина: Полска итно ги крена авионите

Русија во текот на ноќта започна голем ракетен и беспилотен напад врз Украина, при што беа погодени Киев, Лавов, Криви Рих, Полтавската област и други делови од земјата.

Според досега објавените информации, најмалку осум лица загинале, меѓу кои и две деца, а најмалку 30 се повредени. Спасувачките екипи продолжуваат да ги пребаруваат урнатините, поради што бројот на жртвите може дополнително да се зголеми.

Цело семејство погодено во Криви Рих

Најтешките последици биле регистрирани во Криви Рих, каде што балистичка ракета „Искандер-М“ погодила куќа во која живеело многучлено семејство.

Во нападот загинале две девојчиња на возраст од пет и 12 години и четири возрасни лица. Уште осум лица биле повредени, меѓу кои момчиња на возраст од шест и 15 години.

Спасувачите продолжиле со расчистување на урнатините во потрага по лица кои можеби останале затрупани.

Два брана експлозии го потресоа Киев

Првите експлозии во Киев се слушнале кратко по еден часот по полноќ, а втор бран напади следувал околу 3:50 часот.

Украинската служба за вонредни состојби соопшти дека во главниот град загинало најмалку едно лице, а две биле повредени.

Остатоци од соборени ракети и беспилотни летала предизвикале пожари во гаражи во областа Свјатошински и на пазар во областа Оболонски.

Во Бровари, источно од Киев, биле оштетени три куќи, а пет лица се повредени, меѓу кои и едно дете.

Илјадници жители ноќта ја поминаа во метро

Поради воздушната тревога, илјадници жители на Киев се засолниле во станиците на метрото. На социјалните мрежи биле објавени снимки од преполни засолништа во повеќе густо населени делови на градот.

Украинскиот претседател Володимир Зеленски неколку часа пред нападот предупредил дека Русија подготвува нов масовен удар и ги повикал граѓаните да не ги игнорираат предупредувањата.

Погодени станбени згради во Лавов

Неколку експлозии одекнале и во Лавов, град оддалечен околу 70 километри од полската граница.

Регионалниот шеф Максим Козицки изјавил дека биле погодени две повеќекатни станбени згради, додека градоначалникот Андриј Садови соопштил дека најмалку 15 лица се повредени.

Спасувачите и жителите ги расчистувале урнатините поради стравувањата дека под нив може да има уште затрупани луѓе.

Експлозии биле пријавени и во Ивано-Франкивск и во околниот регион, во близина на границата со Романија.

Полска ја активираше воздушната одбрана

Во текот на ноќта низ цела Украина била прогласена воздушна тревога, додека воздухопловните сили предупредувале на балистички ракети насочени кон повеќе региони.

Како одговор на нападот, Полска ги кренала борбените авиони и ги активирала системите за воздушна одбрана за заштита на сопствениот воздушен простор.

Во Полтавската област загинало едно лице по напад врз магацин, а погоден бил и терминал на компанијата „Нова пошта“ во градот Полтава, каде што нема пријавени жртви.