Бомба експлодира пред московски ресторан: Тројца загинати, 21 повреден

Три лица загинаа, а најмалку 21 беа повредени во силна експлозија што вечерта на 1 август се случи кај ресторан во центарот на Москва.

Првичните информации на социјалните мрежи упатуваа на можно истекување гас. Сепак, рускиот Национален антитерористички комитет подоцна соопшти дека експлозијата била предизвикана од импровизирана експлозивна направа.

Жена се обидела да влезе во ресторанот

Според информациите што руските власти ги пренесоа преку државната агенција ТАСС, жена се обидела да ја внесе направата во ресторанот, но била запрена од припадник на обезбедувањето.

Направата експлодирала во близина на ресторанот. Загинале жената што ја носела, обезбедувачот што се обидел да ја запре и еден гостин.

Идентитетот на загинатите и повредените првично не беше јавно соопштен. Безбедносните служби го блокираа поширокиот простор и започнаа истрага.

🇺🇦🇷🇺 #UPDATE | New footage has emerged from the scene. Reports indicate the main target of the Moscow blast was Colonel General Aleksandr Chaiko, Commander of Russia's Aerospace Forces. The explosion at his birthday party proves even top military brass are no longer safe in… pic.twitter.com/V4ZJNfznA2

— Burak Keskin (@Burak_Keskin85) August 1, 2026

Ресторанот бил резервиран за приватен настан

Во моментот на експлозијата ресторанот наводно бил затворен за редовни гости и резервиран за приватна прослава.

Локалните медиуми објавија различни информации дека внатре можеби се одржувале свадба или роденденска прослава на генерал од руските вооружени сили. Овие тврдења засега не се официјално потврдени.

Мотивот сè уште не е познат

Руските власти не соопштија кој ја подготвил направата, ниту дали жената свесно ја носела. Истрагата треба да утврди дали нападот бил насочен кон одредена личност или кон гостите на приватниот настан.

Засега не е објавено ниту дали случајот официјално ќе биде квалификуван како терористички чин. Националниот антитерористички комитет и истражните органи продолжуваат да ги проверуваат снимките и околностите што му претходеле на нападот.