Весна Љ.
Државни почести и доделување ордени
Празничната програма започна рано утрината со оддавање почит на великаните кои ги удрија темелите на државноста. Претседателката Гордана Сиљановска-Давкова положи цвеќе на вечните почивалишта на првиот претседател Киро Глигоров, претседателот Борис Трајковски и првиот премиер Никола Кљусев. Централниот дел од претседателската агенда продолжува во Вила Водно со свечено доделување на Орденот „8 Септември“, кој ќе им биде врачен на истакнатите дејци Јордан Плевнеш и Раде Сиљан, како и постхумно на Џеват Гега, Мето Јовановски и Глигор Чемерски.
-
La Linea v4
699 ден
524.25 ден
Во попладневните часови, фокусот се сели на платото пред Владата каде премиерот Христијан Мицкоски ќе биде домаќин на свеченоста под мотото „Силно светнал ден!“, на која се очекува негово официјално празнично обраќање.
Културно наследство: „35 години – 35 предмети – 35 приказни“
Празнувањето на независноста е збогатено и со уникатни културни настани кои го слават богатото историско минато на земјата. Националниот археолошки музеј во Скопје денеска организира специјален музејски настан насловен „35 години – 35 предмети – 35 приказни“, преку кој посетителите ќе можат да се запознаат со внимателно селектирани артефакти.
„Преку 35 внимателно одбрани предмети и нивните приказни, заедно ќе се потсетиме на богатото културно и историско наследство што сведочи за илјадници години историја на овие простори“, стои во најавата на музејот.
Спектакл за финале: Давид Гета на Националната арена
Месецот исполнет со прослави, кој го вклучуваше настапот на тенорот Хосе Карерас и караванот „Силно светнал ден“ кој посети 12 градови, вечерва го доживува својот врв. На Националната арена „Тоше Проески“ во Скопје ќе се одржи грандиозен концерт на светски познатиот диџеј и продуцент Давид Гета, кој пристигнува со својата импозантна продукција „The Monolith Stadium Show“. Со овој музички спектакл, организиран од „Авалон продукција“ во соработка со Владата, официјално ќе биде заокружена манифестацијата посветена на три и пол децении македонска независност.
