Ручек од еден сад: Пилешки батаци со динстана зелка кои се топат во уста

Потребни состојки (за 4 лица)

За подготовка на овој оброк кој бара само 30 до 60 минути од вашето време, потребни ви се следниве едноставни намирници:

• 10 пилешки батаци
• 1,2 кг слатка зелка
• 2 главици кромид
• 3 чешниња лук
• 3 лажици масло
• 200 мл пилешки бујон
• 1 лажичка мелена слатка пиперка
• ½ лажичка сув мајчина душичка (тимијан)
• 2 ловорови листови
• Сол, бибер и ½ китка свеж магдонос

Начин на подготовка

Најпрво исушете ги пилешките батаци со хартиена салфетка, па зачинете ги со слатката пиперка, мајчината душичка, сол и бибер. На загреано масло кратко запечете ги од сите страни колку да добијат румена боја, па извадете ги и тргнете ги настрана.

Во истата мрсна тава пропржете го кромидот исечкан на ленти. Кога ќе омекне, додадете го ситно сечканиот лук, а потоа и зелката исечкана на пошироки резанки. Ставете ги ловоровите листови, зачинете со сол и бибер и динстајте околу десетина минути додека зелката малку не спласне.

Зелката распоредете ја во сад за печење и прелијте ја со пилешкиот бујон. Одозгора наредете ги претходно запечените батаци и ставете го садот во рерна загреана на 200 степени.

Печете околу 45 минути, сè додека месото целосно не омекне и не добие крцкава румена коричка, а зелката убаво не се запече. Пред послужување, готовото јадење посипете го со сечкан свеж магдонос и сервирајте го топло со свеж леб.