Врчак се врати на „Макфест“ по повеќегодишна пауза: Впечатливото дуо со Симона Поповска што го воодушеви Штип!

Финалната вечер на 41-вото издание на „Макфест“ донесе едно од позабележителните враќања на фестивалската сцена, откако Раде Врчаковски-Врчак по повеќегодишна пауза повторно застана пред штипската публика. Овојпат познатиот рапер не настапи сам, туку на манифестацијата во Штип му се придружи пејачката Симона Поповска, со што публиката доби можност да види едно ново и впечатливо музичко дуо.

Заедно ја изведоа новата песна „Сонце по дожд“, со која беа дел од финалната вечер на фестивалот. Нивната соработка донесе нов дует пред макфестовската публика, а за обожавателите на Врчак тоа беше и прилика повторно да го видат на сцената на која во минатото има настапувано многупати.

Настап доведен до крај и покрај техничките проблеми

Враќањето, сепак, не помина без пречки, бидејќи во текот на изведбата се појавија технички проблеми што не останаа незабележани. И покрај очигледните проблеми со микрофонот, познатиот рапер не се откажа и го доврши својот настап до крај.

„Врчак се врати на сцената на која дебитираше пред повеќе од две децении и покажа дека искуството и професионализмот надвладуваат над секоја техничка пречка.“

Врчак за првпат настапи на „Макфест“ во 2002 година со песната „Ден по ден“ во дует со Адријана Јаневска, а потоа следуваа и макфестовски дуети со Тамара Тодевска, Адријан Гаџа и ДНК. Ни Симона Поповска не е непознато лице за штипската сцена, бидејќи минатата година ја одушеви публиката со емотивната балада „Не ми доаѓаш“, во 2024 година настапи со песната „Без тебе“, а претходно и со „Бакни ме за крај“, со што нивниот заеднички настап обедини две имиња со богата фестивалска историја.