Уапсен директорот на српскиот Хидрометеоролошки завод: Истрага за перење пари и недвижности вредни 650.000 евра

Милиони на сметките без законско покритие

Апсењето е реализирано по налог на Посебното одделение за борба против корупцијата при Вишото јавно обвинителство во Белград. Според информациите од истрагата, сомнителните активности се одвивале од ноември 2019 до ноември 2024 година. Посебно внимание привлекуваат средствата на банкарските сметки на директорот Николиќ, каде што биле уплатени над 41,8 милиони српски динари, 43.150 евра и 44.760 швајцарски франци – пари за кои не постои соодветно покритие во неговите легални приходи.

Покрај сомнежите за перење пари, против директорот се води постапка и за прекршување на Законот за спречување корупција, бидејќи постојат основани сомнежи дека не го пријавил целиот свој имот и доставил неточни податоци за сопствената имотна состојба.

Сомнителни недвижности во Србија и Црна Гора

Во финансиската шема биле вклучени и второосомничената О. Н. (71) и третоосомничениот Ѓ. Н. (45). Истражителите проверуваат како овие лица учествувале во префрлањето на стотици илјади евра за купување станови, деловни простории и гаражни места. Финансиските проверки се насочени кон недвижности лоцирани во Белград, Чачак, Ужице, Бајина Башта, како и на повеќе атрактивни локации во Црна Гора.

На тројцата уапсени им е одредено полициско задржување од 48 часа, по што ќе бидат изведени пред надлежниот обвинител. Истражните органи во меѓувреме интензивно ги чешлаат банкарските трансакции и документацијата за сопственоста.

„Обвинителството ги испитува околностите под кои бил купуван имотот и пренесувањето на сопственичките права, сомневајќи се дека овие трансакции биле преземани со цел да се прикрие вистинскиот сопственик и да се отежне утврдувањето на потеклото на вложените пари во легалните финансиски текови.“