ВОЕНО ВЕЖБАЊЕ: Ким Џонг Ун ја учеше ќерка му како се пука од новиот арсенал

Севернокорејскиот лидер Ким Џонг Ун уште еднаш ја демонстрираше својата воена одлучност, овојпат преку посета на фабрика за муниција каде лично ги тестираше новите модели на пиштоли. Сепак, вниманието на светските медиуми не беше насочено само кон цевките на оружјето, туку кон неговата ќерка, младата Џу Ае, која го придружуваше својот татко во вежбите за гаѓање. Оваа посета на воените објекти не е само рутинска проверка на производните капацитети, туку силна порака за континуитетот на династијата Ким. Додека Ким повикува на радикална модернизација на арсеналот, присуството на неговата ќерка на првата линија на воените тестирања само ги подгрева шпекулациите дека Пјонгјанг веќе ја подготвува следната наследничка на „челичниот трон“.

Модернизација под строг надзор: Ким бара „далекусежни“ капацитети

За време на обиколката на фабриката, Ким Џонг Ун упати децидна наредба за проширување на производството на огнено оружје на „далекусежен начин“. Според него, зголемувањето на борбената ефикасност на војската е врвен приоритет кој бара воведување на најсовремени технолошки процеси. Оваа наредба доаѓа во време на зголемени глобални тензии, каде Северна Кореја не пропушта прилика да го покаже својот напредок, од стратешки крстосувачки ракети лансирани од нови разурнувачи, па сè до пешадиското вооружување кое сега го тестира лично врховниот водач.

Џу Ае – идната лидерка на Северна Кореја?

Јужнокорејската Национална разузнавачка служба (НИС) излезе со анализа дека Џу Ае повеќе не е само придружба на својот татко, туку активен учесник во политичките и воените збиднувања. Фотографиите на кои таа учествува во гаѓање со воени претставници сугерираат дека нејзиниот статус во државната хиерархија рапидно расте. Сè погласни се шпекулациите дека внатрешната номинација за наследник е веќе во тек, а Џу Ае се трансформира во симбол на идната воена моќ на земјата, што претставува преседан во патријархалното уредување на Пјонгјанг.