КЛИНТОН ПРЕД ИСТРАЖИТЕЛИТЕ: „Не видов ништо, не направив ништо“

Поранешниот американски претседател Бил Клинтон сведочеше во рамки на истрагата поврзана со случајот Џефри Епстин, нагласувајќи дека не видел ништо спорно и не направил ништо погрешно

Сведочењето се одржа зад затворени врати пред Одборот за надзор на Претставничкиот дом, а најавено е дека снимката ќе биде објавена. Во своето воведно обраќање, Клинтон истакна дека неговото познанство со Епстин било краткотрајно и завршило многу години пред случајот да стане јавен.

„Не видов и не направив ништо погрешно“

Клинтон изјави дека е свесен за тоа што видел и што не видел, како и за своите постапки, потенцирајќи дека нема вина. Тој посочи дека поради временската дистанца од повеќе од две децении, на дел од прашањата можеби ќе одговори со „не се сеќавам“.

Политичка димензија на истрагата

Претходно сведочеше и Хилари Клинтон, а расправата меѓу демократите и републиканците доби изразена политичка нота. Демократите побараа и актуелниот претседател Доналд Трамп да сведочи, наведувајќи дека неговото име се појавува во документи поврзани со случајот. Трамп ги негираше сите обвинувања за поврзаност со злосторствата на Епстин.