Науката одблизу: Скопје и уште три македонски градови пулсираат во ритамот на Европската ноќ на истражувачите

Факултетите ги отвораат своите лаборатории

Активностите се реализираат под координација на Универзитетот „Св. Кирил и Методиј“ во Скопје, каде повеќе факултети подготвија богата и интерактивна програма. Машинскиот факултет ги отвора своите лаборатории со презентации од областа на роботиката, автоматизацијата и моторните возила, вклучувајќи ја и изложбата на студентски проекти „Project Hub“.

Фокусот кон иднината продолжува на ФЕИТ со работилници за обновливи извори на енергија, Power-to-X технологии и машинско учење, додека ФИНКИ е домаќин на панел-дискусија посветена на најактуелните светски теми – дигиталната трансформација, вештачката интелигенција и сајбер-безбедноста.

Интерактивно учење и природни науки

За љубителите на природните науки, ПМФ нуди уникатни посети на Ботаничката градина, Лабораторијата за креативна математика, Сеизмолошката опсерваторија и презентации за геопросторните технологии. Економскиот факултет, пак, преку интерактивна работилница ќе ја објасни клучната улога на бизнис аналитиката и податоците во современите деловни трендови.

„Организаторите очекуваат овој настан значително да го поттикне интересот за науката, истражувањето и иновациите, особено кај учениците и помладите генерации. Сите активности во рамки на програмата се целосно бесплатни и отворени за јавноста.“