По бегството, соочување со правдата: Перпарим Бајрами на обвинителна клупа за скандалот „Државна лотарија“

Крај на бегството и предавање на граница

Поранешниот директор Бајрами, по кого беше распишана меѓународна потерница откако побегна од државата, сам се предаде на граничниот премин „Блаце“ на 9 септември. Тој веднаш беше спроведен во затворот во Скопје на издржување на претходно определената мерка притвор, а денеска за првпат ќе се соочи со обвиненијата во судницата.

На претходното рочиште, на кое Бајрами беше недостапен, останатите обвинети – меѓу кои и поранешниот вицепремиер Артан Груби, како и Методија Димевски, Скендер Мехмети, Бојан Јанев, Фатмир Рамадановски и Александар Димитриоски, се изјаснија дека не се чувствуваат виновни. Единствен исклучок беше Башким Авдиу, кој побара обвинението да му биде преведено на албански јазик за да може да го разбере товарот што му се става.

Штета од речиси 10 милиони евра

Според обвинението, кое го застапуваат јавните обвинители Даниел Коцев и Александар Давчевски, случајот опфаќа сериозни финансиски малверзации и злоупотреба на службената положба на штета на државниот буџет.

„Обвинетите се товарат дека во текот на 2023 и 2024 година ги пречекориле своите службени овластувања, со што предизвикале огромна финансиска штета на ‘Државната лотарија’ во вкупен износ од над 596 милиони денари (596.125.511 денари).“