Русија го буди Петрозаводск, нови касарни близу Финска, тревога на север

Сателитски фотографии откриваат ново руско воено присуство во близина на Финска

Русија започна со обнова на напуштена воена база во градот Петрозаводск, сместен во Република Карелија, близу до границата со Финска. Целта е да се сместат до 15.000 војници од новоформираниот 44. армиски корпус. Оваа информација ја потврдуваат сателитските снимки објавени од финската јавна телевизија, а пренесени и од неколку меѓународни медиуми.

Снимките го прикажуваат просторот на поранешниот гарнизон во близина на електраната Рибка, кој беше напуштен од почетокот на 2000-тите години. Локацијата е веќе расчистена од ниска и висока вегетација, а до октомври минатата година забележани се над 50 воени камиони и други возила. Во Петрозаводск постои и голема воздухопловна база, како и магацин за воена опрема, а во тек е изградбата на нови работилници и инфраструктура.

Според информации од локалните медиуми, изградбата на нови касарни во Петрозаводск се очекува да започне во текот на годинава. Русија го формираше 44. армиски корпус во Карелија уште во 2024 година, со што беа додадени околу 15.000 војници. Дел од нив веќе пристигнале, што создава потреба за брза изградба на објекти за сместување и обука.

Воениот аналитичар и поранешен фински разузнавач, Марко Еклунд, за споменатата телевизија изјави дека постои значителна веројатност овие сили да се обучуваат за испраќање на боиштето во Украина. Паралелно со тоа, се работи на изградба на ново воено населено место во Кандалакша, во Мурманска област, што дополнително укажува на зголемена воена активност во северозападниот дел на Русија.

Во меѓувреме, Финска и Шведска на 27 септември минатата година формираа заедничка бригада со околу 5.000 војници, која ќе биде стационирана во Лапонија, долж границата со Русија. Финската воена разузнавачка служба на 22 јануари годинава соопшти дека Русија не се откажала од обидите за оштетување на подводната инфраструктура во Балтичкото Море, што дополнително ги зголемува безбедносните грижи во регионот.