Збогум лето: Уживајте во денешните 32 степена, од утре следува потоп и драстичен пад на температурите

Последно уживање на 32 степена

Времето денеска ќе биде променливо облачно, но со чести сончеви периоди. Претежно во северните и источните делови од земјава постојат услови за слаб, локален дожд. Утринските температури се движеа од 8 до 15 степени, додека дневниот максимум ќе достигне летни 32 степена, проследени со слаб до умерен југоисточен ветер.

Слично ќе биде и во Скопје, каде живата во термометарот ќе се искачи до 32-от поделок. Скопјани ги очекува променлива облачност со сончеви интервали, но и услови за слаб локален дожд во попладневните часови.

Потоп од недела, есен од вторник

Но, оваа релативно стабилна и топла слика нема да трае долго. Веќе од утре не очекува сериозна дестабилизација на временските прилики.

„Се очекуваат повремени врнежи и нестабилност со пороен дожд, појава на грмежи и засилен ветер. Врнежите ќе продолжат и во понеделник, иако ќе бидат со нешто послаб интензитет“, најавуваат метеоролозите.

Вистинскиот есенски шок, сепак, пристигнува во вторник. Тогаш се очекува стабилизирање на времето, но и драстичен пад на температурите за неколку степени, предизвикан од силен продор на постуден воздух од север. Подгответе ги чадорите и потоплите јакни – есента и официјално ја презема контролата.