Макрон жестоко го нападна Трамп во ОН: „Мировниот план за Газа е спектакл што треба да нè засрами сите“

Удар врз мировниот план на Трамп

Говорејќи од истата говорница само неколку часа откако Трамп го презентираше својот мировен план за Газа како дипломатски триумф, Макрон истакна дека во енклавата сè уште не е отворен ниту еден хуманитарен коридор, и покрај прогласениот мир. Удирајќи со тупаница по говорницата, тој потсети на признавањето на Палестина и го осуди цинизмот на оние кои тоа го нарекуваат „само парче хартија“.

„Но, каков кредибилитет имаме ако продолжиме да бидеме неактивни пред ситуацијата во Газа? Некои се фалат со наводен мир. Но, тој мир не го овозможи повторниот пристап на хуманитарна помош. Дали едноставно ќе стоиме настрана и ќе го гледаме овој спектакл што треба да нè засрами сите нас?“, порача Макрон.

Белата куќа возвраќа на критиките

На забелешките на Макрон веднаш реагираше портпаролката на Белата куќа, Ана Кели, која силно ги одбрани постигнувањата на американската администрација. Таа нагласи дека претседателот Трамп ја завршил војната меѓу Израел и Хамас, ги ослободил преживеаните заложници и го предводи спроведувањето на планот за мир, критикувајќи го францускиот лидер дека само зборува, додека Трамп директно го решава проблемот.

Ова беше последно обраќање на Макрон во ОН пред претседателските избори во Франција следната година. Тој го искористи моментот да повика на заштита на Обединетите нации, порачувајќи дека светот „не смее да го прифати новиот поредок на неказнивост што некои би сакале да го изградат“.