Муцунски: Во време на кризи, соработката е единствената реална опција

Муцунски од Будимпешта: Во време на кризи, владите мора да реагираат брзо и заеднички

Министерот за надворешни работи и надворешна трговија Тимчо Муцунски порача дека во време на засилени безбедносни и геополитички предизвици, владите мора брзо да се приспособуваат и да дејствуваат заеднички, бидејќи соработката останува единствената реална опција.

Муцунски се обрати на меѓународната конференција Budapest Balkans Forum 2026 во Будимпешта, каде учествуваше на воведната дебата на високо ниво на тема „Централна Европа и Западниот Балкан во новата геополитичка ера“.

Порака за европскиот пат

Во своето обраќање, Муцунски истакна дека Македонија останува проевропски ориентирана и целосно фокусирана на реформите и усогласувањето со заедничката надворешна и безбедносна политика на Европската Унија.

Тој нагласи дека државата направила сериозни национални отстапки на патот кон ЕУ, но дека очекува процесот на проширување да биде јасен, кредибилен и предвидлив.

Предвидлив партнер, но и реципрочни очекувања

Муцунски порача дека задачата на државата е да биде предвидлив партнер на Европската Унија, но дека истата таква предвидливост и кредибилност се очекуваат и од земјите членки.

Според него, Македонија јасно знае дека припаѓа на Европа, но очекува европскиот однос кон регионот да биде еднакво стабилен и реципрочен.

Коридорите 8 и 10 се стратешки приоритет

Во говорот, министерот посебно го истакна значењето на Коридорот 8 и Коридорот 10, оценувајќи ги како клучни од безбедносен, политички, економски и трговски аспект.

Тој посочи и на енергетските проекти, нагласувајќи дека земјата работи на интерконектор со Грција, кој треба да овозможи пристап до LNG гасот од Александруполис.

Унгарија како стратешки партнер

Муцунски подвлече дека односите со Унгарија имаат стратешка важност за Македонија. Според него, тоа партнерство отвора повеќе можности за инвестиции, економска соработка и полесен пристап до пазарите за компаниите од двете држави.

Тој оцени дека Унгарија е важен сојузник и силен поддржувач на европската перспектива на регионот.