„Чистка“ на Бихаќка: Венко Филипче го распушти целото раководство на СДСМ!

Политички земјотрес во СДСМ: Целото раководство и Извршниот одбор поднесоа оставки на барање на Филипче за да овозможат „ресетирање“ на партијата

На денешната седница на Извршниот одбор на Социјалдемократскиот сојуз на Македонија (СДСМ) се случија радикални кадрови промени. На директен предлог на претседателот Венко Филипче, оставки поднесоа сите клучни фигури во партиската хиерархија: заменик-претседателката, потпретседателите, генералниот секретар, организациските секретари, како и сите членови на Извршниот одбор. Овие оставки се депонирани до Централниот одбор и до самиот претседател, како дел од најавениот процес на длабоки внатрешни реформи и реорганизација.

„Ново поглавје“: Се најавува кадровско освежување со компетентни лица

Од партијата потегот го оценија како „одговорен и морален чин“ кој има за цел да отвори простор за ново поглавје во делувањето на СДСМ. Филипче најави период на кадровско освежување, вклучување на нови лица и внатрешна мобилизација за враќање на енергијата на партијата. На една од наредните седници на Централниот одбор, претседателот ќе предложи нови имиња за испразнетите функции, при што од СДСМ ветуваат дека единствен критериум за избор ќе биде компетентноста на кандидатите.