Жештините не попуштаат: Македонија оди кон температури до 40 степени

Топлотниот бран во Македонија продолжува, а денеска нè очекува сончево и многу топло време со мала до умерена локална облачност.

Ќе дува слаб до умерен ветер од северен правец, кој долж Повардарието повремено ќе засилува. Во попладневните часови е можен локален развој на нестабилност со краткотраен пороен дожд и ретки грмежи.

Температури до 38 степени, во Скопје до 37

Минималните температури ќе се движат од 13 до 22 степени, додека максималните ќе достигнат меѓу 32 и 38 степени.

Во Скопје ќе биде сончево и многу топло со мала до умерена облачност. Ќе дува слаб до умерен северен ветер, а температурата ќе се движи од минимални 21 до максимални 37 степени.

Во наредните денови можни и 40 степени

Периодот на сончево и многу топло време ќе продолжи и во следните денови. Во некои места дневната температура ќе се искачи до 40 степени.

И покрај високите температури, попладне на одделни места ќе има услови за нестабилна облачност, краткотраен пороен дожд и ретки грмежи.

Здравствените власти предупредуваат на ризикот од жештините

Здравствените власти апелираат граѓаните да ги почитуваат препораките и, доколку нема неопходна потреба, да избегнуваат престој на отворено во најтоплиот дел од денот, од 11 до 17 часот.

Препораката особено се однесува на повозрасните лица, хронично болните и бремените жени.

Според информациите, во Брзата помош во овој период е забележан значително зголемен број повици, најчесто поради колапси, проблеми со крвниот притисок и тегоби кај лица со хронични заболувања.