Зеленски: Мирот има цена, гаранции и притисок врз Русија

Володомир Зеленски вели дека најголемата желба му е мир и враќање на „нормалниот живот“, но дека крајот на војната бара три конкретни столба, не само добри намери.

Украинскиот претседател за „Политико“ посочи дека патот до завршување на конфликтот го гледа низ силни безбедносни гаранции, јасен договор за реконструкција по војната и поголем директен притисок врз Русија. Според него, без овие три елементи, секој договор би останал кревок и привремен, а ризикот од нова ескалација би висел над регионот.

Зеленски оцени дека Доналд Трамп би можел да оди чекор подалеку со „целосни санкции“, вклучително и во сферата на енергетиката и особено нуклеарната енергија. Тој нагласи дека Европа направила многу, но дека не вовела санкции кон нуклеарниот сектор и Росатом, што, според неговата логика, остава значаен простор за финансиски кислород во рускиот систем.

Избори по војната, надеж за мир „следната година“

На прашањето дали очекува мир следната година, Зеленски одговори дека се надева оти ќе има мир и дека луѓето ќе се вратат на нормален живот. Во однос на можноста за избори, тој рече дека во принцип би сакал тоа да се случи „што е можно побрзо“, но подвлече дека прво мора да заврши војната, а ако некој навистина сака брзи избори, најдобриот пат е што побрзо завршување на конфликтот.

Во делот за Владимир Путин, Зеленски оцени дека времето не работи бескрајно во негова корист, посочувајќи ја возраста од 73 години и додавајќи дека се надева оти „нема да има премногу време“, во контекст на притисокот за завршница.