Историски пад за норвешката монархија: Скандалите ја намалија довербата

Анкета на НРК покажува историски најниско ниво на поддршка за норвешката монархија

Според последното истражување, околу 60 проценти од граѓаните ја поддржуваат династијата Гликсбург предводена од кралот Харалд V, што претставува значителен пад во однос на 70 проценти само еден месец претходно. Монархијата во Норвешка постои од 1905 година, по мирното раздвојување од Шведска.

И покрај падот, кралот Харалд и престолонаследникот принцот Хокон сè уште уживаат висок личен рејтинг. На скала од 1 до 10, кралот добил оценка 9,2, а Хокон 7,9.

Контроверзии околу Мете-Марит и Епштајн

Падот на довербата делумно се поврзува со контроверзиите околу принцезата Мете-Марит и нејзините поранешни контакти со Џефри Епштајн. Таа добила оценка 3,7, што е значително намалување во споредба со претходната година. Иако јавно се извини, откритијата за комуникацијата со години предизвикаа реакции во јавноста.

Дополнителен удар за угледот претставува судењето против Мариус Борг Хојби, нејзиниот син од претходна врска, кој се соочува со повеќе обвиненија. Процесот започна во февруари 2026 година и редовно отвора нови прашања.

Зголемена поддршка за република

Контроверзии предизвика и принцезата Марта Луиз, чии јавни настапи и комерцијални активности добија критики. Во меѓувреме, бројот на граѓани што поддржуваат републикански модел пораснал на 27 проценти, додека во 2017 година монархијата имала поддршка од 81 процент.

И покрај кризата, аналитичарите сметаат дека монархијата нема веднаш да биде укината, но падот на довербата отвора нова фаза во јавната дебата за иднината на институцијата.