МАКЕДОНСКИТЕ СТУДЕНТИ-ИНЖЕНЕРИ БЛЕСНАА: MES Racing го претстави новиот тркачки болид на Машинскиот факултет

Инженерство од светски ранг и демонстративно возење

MES Racing е првиот и единствен македонски Formula Student тим. Преку своето континуирано учество на меѓународни натпревари, овие млади луѓе достојно ги претставуваат државата, македонското студентско инженерство и огромниот потенцијал на младите стручни кадри. На денешниот настан, тимот детално ги презентираше резултатите од изминатата сезона и сложениот процес на изработка на новиот болид, по што следуваше и атрактивно демонстративно возење.

Посебно значење има мултидисциплинарниот пристап на проектот. Во креирањето на болидот активно учествуваат студенти од различни области кои практично ги применуваат своите знаења од машинството, електротехниката и други сродни дисциплини, функционирајќи како вистински професионален инженерски тим.

Институционална поддршка за младите таленти

На презентацијата присуствуваше и министерката за енергетика, рударство и минерални суровини, Сања Божиновска. Таа истакна дека ваквите проекти се најдобар доказ дека Македонија располага со млади луѓе со знаење, амбиција и капацитет да создаваат сложени решенија конкурентни на меѓународната сцена.

„Како институции мораме да бидеме поддршка за младите кои создаваат. Нашата задача е да им помогнеме нивното знаење и идеи да добијат можност да се развиваат и да станат дел од реалниот индустриски и економски развој. Не смееме да дозволиме талентот да остане само потенцијал – треба да создадеме услови тој да се претвори во резултат“, порача министерката Божиновска.

Во знак на благодарност за досегашната соработка и институционална помош, тимот на MES Racing ѝ врачи специјална благодарница на министерката и на Министерството за енергетика, рударство и минерални суровини.