Трамп го стега обрачот: Дозволите за работа за мигрантите скратени на 18 месеци

Ригорозен потег на Трамп: Важноста на дозволите за работа во САД драстично скратена од 5 години на само 18 месеци

Администрацијата на американскиот претседател Доналд Трамп воведе нова, остра мерка во рамките на својата имиграциска политика. Периодот на важност на работните дозволи за бегалците, барателите на азил и другите категории мигранти е официјално намален од досегашните пет години на само 18 месеци. Службата за државјанство и имиграција на САД (USCIS) го образложи овој чекор како неопходен за овозможување на „почести и поригорозни безбедносни проверки“ на странските државјани. Оваа промена ќе погоди стотици илјади луѓе, но и американските компании, особено во секторот за пакување месо, кои во голема мера се потпираат на оваа работна сила.

Два милиони луѓе си заминале: Трамп најавува 600.000 депортации до Нова година

Имиграцијата останува централен фокус на Белата куќа. Според податоците на Одделот за домашна безбедност, откако Трамп ја презеде функцијата во јануари, САД ги напуштиле речиси 2 милиони луѓе. Од нив, 530.000 биле присилно депортирани, додека 1,6 милиони заминале „доброволно“. Администрацијата најави амбициозна цел – да ја зголеми бројката на депортации на 600.000 до крајот на годината. Дополнително, по прогласувањето на вонредна состојба во Вашингтон на 11 август поради наводни „насилни банди“, федералните агенти уапсиле околу 1.100 луѓе само во главниот град.