300 научни трудови, 30 патенти и Кралска академија: Охриѓанецот кој го освојува светот на науката!

Петар Поповски, долгогодишен професор на Универзитетот во Олборг и еден од најугледните македонски научници во светот, објави историска вест. Примен е за член на престижната Кралска данска академија на науките и книжевноста. Станува збор за една од најстарите и најцeнетите научни институции во Европа. Меѓу поранешните членови на оваа академија е и Нилс Бор — еден од највеликите физичари на 20 век.

„Нилс Бор е еден од моите херои”

Поповски не ја скри емоцијата во својата објава на социјалните мрежи. „Привилегиран сум што станав член на Кралската данска академија на науките и книжевноста, чијшто некогашен претседател е еден од моите херои, Нилс Бор”, напишал тој. Додал дека со нетрпение очекува да придонесе за активностите на Академијата. „Би сакал да им се заблагодарам на научниците кои ја поддржаа мојата номинација”, изјавил Поповски.

Од Охрид до Кралската академија

Поповски е роден во Охрид во 1973 година. На Електротехничкиот факултет во Скопје дипломирал во 1997, а магистрирал во 2000 година. Докторирал во 2004 година на Универзитетот во Олборг во областа на безжичните комуникации. Во 2008 година се вработил на факултетот, а денес е еден од водечките светски експерти за безжични комуникациски системи. Патот од охридски студент до член на академијата на Нилс Бор трал точно три децении.

Над 300 научни трудови и 30 патенти

Поповски е автор или коавтор на повеќе од 300 научни трудови објавени во реномирани списанија, конференции и книги. Поседува над 30 патенти и патентни апликации. Главен уредник е на IEEE Journal of Selected Areas in Communications. Претседател е на IEEE Communication Theory Technical Committee. Претседава и со Шведската истражувачка фондација за 6Г безжични системи. Зад изборот за член на Академијата стои научна биографија која тешко има рамен во регионот.

Семејство посветено на науката

Поповски не е единствениот научник во семејството. Неговата сопруга, Искра Дуковска-Поповска, е вонреден професор на истиот универзитет во Олборг. Нејзините полиња на експертиза се управување со операции, синџири на снабдување и циркуларна економија. Двајцата заедно претставуваат реткост — македонски научен пар кој остави длабока трага во данската академска средина.