Потресна и гневна изјава на таткото на Фросина пред судот: „Ова не е правда, ова е награда за најбрутално убиство!“

Болката не стивнува, а гневот и чувството на неправда експлодираат со уште поголема жестина!

Тодор Кулаков, таткото на трагично прегазената Фросина Кулакова, денеска упати нови, уште поостри обвинувања по вчерашната пресуда за Васил Јованов, нарекувајќи ја 12-годишната затворска казна „награда за брутално убиство“.

Тој со горчина изјави дека „во оваа држава убијците се прогласуваат за светци, а животот на Фросина е небитен!“ Дали навистина правдата е слепа или, како што тврди очајниот татко, системот ги штити виновниците, па дури и прикрива клучни сведоци и докази?

Во изјава дадена денеска пред Основниот кривичен суд во Скопје, Тодор Кулаков, таткото на загинатата Фросина, не го криеше своето длабоко разочарување и револт од вчерашната пресуда со која Васил Јованов доби 12 години затвор.

„Дванаесетгодишна казна е награда за вакво најбрутално убиство во сообраќајот“, категоричен беше Кулаков. Тој упати жестока критика кон судскиот систем, велејќи дека во држава во која „дилерите на дрога и убијци се прогласуваат за светци, спортисти, посветени студенти, според зборовите на одбраната, што беше прифатено од судскиот систем, па затоа е таква пресудата“.

Со нескриена горчина, Кулаков додаде: „Убиецот Васо и останатите тројца во автомобилот се светци, а загубата на животот на Фросинче е едноставно небитно. Животот одамна е докажано дека нема вредност според законите на оваа држава“.

Таткото на Фросина не застана тука, туку изнесе и сериозни обвинувања за текот на постапката. Тој порача дека „никој не обрнал внимание на повеќето сведоци кои биле прикриени и должни да одговараат пред законот за уништување на клучни докази“, со што фрли сомнеж врз интегритетот на целиот процес.