Асфалт од 600 илјади евра во Битола се распадна по нецел месец, Општината најави санација на трошок на изведувачот

Инфраструктурен скандал ја тресе Битола! Улица асфалтирана пред помалку од еден месец, за чија реконструкција беа потрошени неверојатни 600 илјади евра народни пари, буквално се распаѓа пред очите на запрепастените граѓани!

Дали е ова примерот за фаленото „скандинавско управување“ или уште еден доказ за негрижа, неквалитетна работа и фрлање на огромни суми во ветер? Советникот Иван Чулакоски објави шокантно видео на кое со голи раце крева цели парчиња од свежиот асфалт, прашувајќи се за одговорноста за овој инфраструктурен дебакл што предизвика лавина реакции.

„Шведскиот асфалт“ во Битола се откорна за само 20 дена

Распукување и откорнување на асфалтот е забележано на улицата Бурса, попозната како Индустриска, во Битола, иако истата беше темелно реконструирана и асфалтирана пред неполн месец. Советникот Иван Чулакоски од независната граѓанска иницијатива „Поинаку“ преку видео објава на социјалните мрежи ја алармираше јавноста.

На снимката се гледа како Чулакоски без никаков напор подига големи парчиња од новопоставениот асфалт. „Веднаш по реакциите на граѓаните, излеговме на терен, ова е улицата Бурса… Може да видите колку добро е асфалтирана улицата само пред 20 дена“, иронично коментира Чулакоски во видеото.

Под објавата тој напишал „Шведскиот асфалт на Коњановсен“, алудирајќи на неодамнешната изјава на премиерот Христијан Мицкоски (од 5 мај) дека градоначалниците од ВМРО-ДПМНЕ со општините управуваат на скандинавски начин.

Општина Битола: Настаната е девијација, изведувачот ќе го санира оштетувањето

По бурните реакции во јавноста, од Општина Битола излегоа со официјално соопштение. Тие потврдија дека настанала „девијација на горниот слој на коловозот“ на неодамна асфалтираната улица, во непосредна близина на Битолската пиварница.

Од локалната самоуправа уверуваат дека, согласно договорот за изведување на работите, настанатото оштетување ќе биде целосно санирано од страна на изведувачот, бидејќи проектот е сè уште во гарантен период. „Сите аномалии кои се појавиле или ќе се појавуваат, обврска е на изведувачот да ги санира, со цел улицата да има нормален тек и изглед“, се вели во соопштението.

Тие додаваат дека градоначалникот во повеќе наврати побарал професионалност и одговорност во изведбата на инфраструктурните проекти и дека улиците на кои претходно се појавиле недостатоци по реконструкцијата биле коригирани на трошок на изведувачите, бидејќи општински средства може да се исплатат само за успешно завршена работа.

Скапа реконструкција финансирана од Светска банка и историја на слични пропусти

Реконструкцијата на улицата Бурса беше изведена во должина од 2.418 метри, а вкупната вредност на проектот изнесуваше 37,6 милиони денари, односно над 600.000 евра. Средствата за овој зафат беа обезбедени од Светска банка, во рамките на проектот за поврзување на локални патишта.

За жал, ова не е прв случај на брзо оштетување на штотуку реконструирани сообраќајници во Битола. Јавноста се сеќава дека пред извесно време, за само два месеца, се деформираше и асфалтот на кружниот тек кај старата Ветеринарна станица во градот. Корекцијата на тој пропуст ја изврши изведувачот на сопствен трошок минатата година, по четири и пол месеци од појавувањето на проблемот.