Повеќе од само дожд: Голема Река достигна 210 см, Долна Бела Црква е под вода

Поради обилните врнежи, во подрачјето на Општина Ресен се излеаја Болнска и Источка Река во селата Царев Двор и Дрмени, при што се поплавени над 50 куќи, магацински простори и земјоделско земјиште.

Центарот за управување со кризи (ЦУК) информира дека поплави се евидентирани и кај селото Долна Бела Црква од излевање на Голема Река, чиј водостој достигнал критични 210 сантиметри. На терен се ангажирани екипи на јавните претпријатија и приватни фирми со вкупно 7 пумпи и багери за санација на штетите, особено во населбата Црквиште.

Се следи состојбата во Битола, Охрид и Демир Хисар

ЈП „Македонија пат“ расчистува наноси од земја на повеќе делници. Директорот на ЦУК е во постојана координација со градоначалниците, а состојбата будно се следи и во другите засегнати региони како Битола, Демир Хисар, Охрид и Крива Паланка, каде дежурни екипи остануваат на терен и во текот на ноќта.