Кој е грчкиот „Ескобар“ уапсен во Катерини? Од морнар до мозок на операција со 7 тони кокаин

Грчкиот „Ескобар“, познат како Алекос „Дебелиот“ (Алекос Ангелопулос), е уапсен во Катерини како мозок на најголемата мрежа за трговија со кокаин во историјата на Грција, по заплената на рибарски брод со 7 тони дрога.

Според грчките медиуми, неговата животна приказна е достојна за филмско сценарио. Син на полицаец од Неои Пори, тој кариерата ја почнал како морнар шверцувајќи цигари, за подоцна да стане главен играч во трансатлантскиот шверц на кокаин од Латинска Америка и извоз на оружје за Никарагва.

Алекос е стар познаник на полицијата и американската ДЕА. Уште во 2004 година бил осуден за шверц на 5,4 тони кокаин со бродот „Африка I“, но и за иновативно перење пари преку добитни тикети од државната лотарија (ОПАП), каде месечниот обрт во неговата обложувалница достигнувал 12,5 милиони евра. Иако претходно бил осуден на доживотен затвор, па пуштен, сега повторно е приведен заедно со уште петмина соработници.