Трамп тврди дека Иран „се јавил повеќе пати“: Дали се готви голем договор?

Американскиот претседател Доналд Трамп тврди дека Техеран испраќа сигнали за дијалог по зголеменото американско воено присуство во регионот.

Во интервју за порталот Axios, Трамп изјави дека Иран е заинтересиран за дипломатско решение на актуелните тензии, откако носачот на авиони „УСС Абрахам Линколн“ пристигна во зоната на одговорност на американската Централна команда.

Зголеменото воено присуство го менува однесувањето на Иран.

Трамп нагласи дека распоредувањето на голема американска флота во близина на Иран има јасен ефект. Според него, Техеран повеќепати се јавувал со желба за разговори и постигнување договор, оценувајќи дека ситуацијата е „променлива“.

Американската флота е распоредена во име на регионалната стабилност.

Од CENTCOM соопштија дека борбената група на носачи на авиони, меѓу кои и „УСС Абрахам Линколн“, е распоредена на Блискиот Исток со цел зајакнување на безбедноста и стабилноста во регионот. Носачот моментално се наоѓа во Индискиот Океан.

САД сè уште немаат донесено конечна одлука за ескалација.

Според информации на Axios, повикувајќи се на неименувани извори, Трамп засега не донел конечна одлука за евентуална воена ескалација. Сепак, тој потсети дека за време на неодамнешните протести во Иран јавно ги поддржал демонстрантите и ги предупредил иранските власти дека продолжувањето на репресијата може да доведе до американска интервенција.