ИСТОРИСКИ УСПЕХ: Македонските информатичари освоија сребро и две бронзи на Олимпијадата во Узбекистан!

Македонскиот тим на најпрестижното светско натпреварување по алгоритамско програмирање го сочинуваа Дамјан Давков од Штип, Владимир Грчев од Кочани, Никола Стојковски од Скопје и Виктор Максимоски од Гостивар. Тие беа предводени од тим лидерите д-р Миле Јованов и д-р Емил Станков од Факултетот за информатички науки и компјутерско инженерство (ФИНКИ).

Дамјан Давков испиша историја

Посебно значење има успехот на штипјанецот Дамјан Давков, ученик во Математичко-информатичката гимназија. Во Ташкент тој го освои својот трет последователен сребрен медал на оваа олимпијада. Со вкупно четири одличја од четири учества (три сребра и една бронза), Давков се издвојува како најуспешниот македонски натпреварувач во историјата на ИОИ.

Брилијантен настап имаа и дебитантите Владимир Грчев и Никола Стојковски, кои уште при своето прво учество успеаја да се закитат со бронзени медали, додека Виктор Максимоски доби олимписка пофалба. Овој резултат е силна потврда дека Македонија има нова генерација врвни млади информатичари.

„Со овогодишните три медали, од првото учество во 1996 година до сега, Македонија има освоено вкупно 7 сребрени, 26 бронзени медали и 5 олимписки пофалници. Овој биланс е исклучително значаен за земја со помалку од два милиони жители и е потврда за континуитетот и квалитетот на нашата посветеност во развојот на младите таленти,“ изјави проф. д-р Миле Јованов.

Најмасовна олимпијада досега

Овогодинешното издание во Узбекистан ќе остане запаметено како најмасовната олимпијада во историјата, со учество на дури 375 натпреварувачи од 92 земји од целиот свет. Натпреварот ги проверува вештините за анализа на проблеми, дизајн на алгоритми и програмирање во исцрпувачки дводневен маратон.

Изборот на македонскиот тим беше организиран преку целогодишен циклус на Здружението на информатичарите на Македонија (ЗИМ), со поддршка од ФИНКИ и општествено одговорни компании. Следен предизвик за македонските ученици е Балканската олимпијада по информатика која кон средината на септември ќе се одржи во Тирана, Албанија.