Брвеница под полициска опсада: Специјалци упаднаа во зори и најдоа арсенал оружје и вреќи со пари

Рано утрово, точно во 06:40 часот, селото Брвеница беше разбудено од сирени и специјалци на СВР Тетово кои извршија масовна рација и уапсија пет лица поради поседување на дрога, оружје и голема сума на кеш.

Полициските службеници од Одделението за недозволена трговија извршиле синхронизирани претреси во повеќе куќи и помошни простории, постапувајќи по судска наредба. Уапсени се жителите на Брвеница со иницијали И.Ј., С.З., Д.П., Д.П. и С.З., на возраст од 36 до 69 години.

Арсенал оружје и „бел прав“

Она што го пронашла полицијата наликува на мал воен магацин. Кај осомничените се откриени куршуми за автоматска пушка (калибар 7.62), пиштоли без дозвола, рамки со муниција, како и паковки со бела прашкаста материја и дигитална вага со остатоци од дрога.

Покрај илегалното оружје, одземени се и легален ловен карабин и пушка, кои сега ќе бидат предмет на вештачење.

Пронајдени списоци на должници и 30.000 евра

Особено интригантен е пронајдокот кај 65-годишниот Д.П. Полицијата запленила два списоци и тетратка со имиња на лица, што упатува на евиденција за долгови или дилерска мрежа.

Покрај евиденцијата, во кеш биле пронајдени и одземени околу 31.640 евра, 3.400 швајцарски франци и 56.500 денари, за кои се сомнева дека потекнуваат од криминални активности. Против петмината ќе бидат поднесени пријави по членовите 215 и 396 од Кривичниот законик.