Пезешкијан повика на заздравување по немирите, Иран бара излез од длабоката криза

Иранскиот претседател Масуд Пезешкијан повика на заздравување и смирување на страстите по протестите што оставија длабоки траги низ Иран.

На церемонијата на филмскиот фестивал „Фаџр“ во Техеран, Пезешкијан порача дека „раните“ од немирите треба да се залечат, а не да се продлабочуваат „до степен на инфекција“. Тој апелираше јавноста да гледа напред, наместо да се продолжи со расправии кои, според него, ѝ отвораат простор на државата за „странски непријатели“.

Претседателот изјави дека лично е тажен поради развојот на настаните и дека не може да спие мирно, но неговите зборови, според извештајот, биле пречекани со умерена реакција од присутните. Дел од уметниците и добитници на признанија ја бојкотирале церемонијата, како знак на солидарност со жртвите.

Спорни бројки и натпревар во наративи

Во јавноста кружат различни проценки за бројот на жртви. Според официјалните бројки, во немирите од крајот на декември до почетокот на јануари загинале повеќе од 3.000 луѓе. Организацијата ХРАНА (со седиште во САД) наведува над 7.000 жртви, додека дел од медиумите на персиски јазик во странство споменуваат уште повисоки проценки. Властите во Иран ги отфрлаат тие тврдења и инсистираат дека меѓу демонстрантите имало „странски платеници“ и „терористи“.

Напнат мир, економија и сенка од нов конфликт

Иако протестите во моментот се смирени, атмосферата останува напната. Економските проблеми што ја поттикнаа кризата не се решени, а паралелно постои и страв од поширока регионална ескалација. Во текстот се наведува дека ризикот од нов воен судир со САД и Израел би се зголемил доколку обновените разговори меѓу Техеран и Вашингтон пропаднат.