Македонскиот „Мал Версај“: Како еден отомански бег донесе француски шмек во Ресен

Во срцето на Ресен се наоѓа една од највпечатливите градби во Македонија – Сарајот на Ахмет Нијази Бег, објект инспириран од француските дворци и познат како „Малиот Версај“.

Изграден во француско-неокласичен стил на почетокот на 20 век (1905-1922), овој дворец бил амбициозен проект на ресенскиот бег и младотурчин, кој за жал починал во 1912 година, не дочекувајќи го комплетирањето на ентериерот.

Зградата се одликува со симетрична форма, централна кула и масивни ѕидови дебели до 105 сантиметри. Низ историјата имала различни намени – од административен објект до седиште на окупаторски сили, а денес е центар на културниот живот во Преспа. Во Сарајот се сместени Домот на културата „Драги Тозија“, библиотека со над 31.000 книги, галеријата на Кераца Висулчева и познатата Ресенска керамичка колонија под закрила на УНЕСКО.