„Толку пријателски што никој не сакаше да спушти прв“: Кремљ открива детали од разговорот Трамп-Путин

Час и половина на телефон: Детали од Кремљ

Според советникот за надворешна политика на Путин, Јури Ушаков, неодамнешниот телефонски разговор меѓу двајцата лидери траел час и половина, а најголемиот дел бил посветен на напорите за решавање на војната во Украина. Притоа, Путин ја минимизирал веројатноста за скоро продолжување на мировните преговори.

„Ниту еден од нив не сакаше прв да ја прекине врската. Ја прекинаа истовремено, буквално во истиот момент“, објасни Ушаков, доловувајќи ја пријателската атмосфера.

Како што веќе е познато, за време на разговорот Трамп дозволи Русија да испорачува дизел на американскиот и светскиот пазар за да се намалат цените на горивата, што резултираше со неочекувано и привремено олеснување на американските санкции. Овој чекор економскиот советник на Путин, Кирил Дмитриев, го опиша како „легендарен и историски“.

Остар напад врз Зеленски

Очекувано, потегот со дизелот наиде на жестоки критики од украинскиот претседател Володимир Зеленски, кој го нарече „подарок за Путин и инвестиција во руската војна“. Сепак, Трамп не остана покус и ја сврте реториката директно против украинскиот лидер, обвинувајќи ја Украина за глобалниот недостиг на дизел поради нивните напади врз руските рафинерии.

„Рековме: ‘Можете да ѝ правите што сакате на Русија, но не ги напаѓајте рафинериите‘, бидејќи тоа предизвикува глобален проблем. Зеленски можеше да склучи многу договори, но од некаква причина, никогаш не го прави тоа“, изјави Трамп.

Тој отиде чекор подалеку, порачувајќи дека е време Украина да добие нов претседател, став кој го поддржа и руската страна, потенцирајќи дека на Киев му е потребно раководство фокусирано на мир.