Холивуд во шок: Синот на Роб Рајнер се соочува со смртна казна за убиството на родителите

Ник Рајнер (32) се соочува со смртна казна откако официјално е обвинет за бруталното убиство на неговите родители, холивудската легенда Роб Рајнер (78) и неговата сопруга Мишел (68), во нивниот дом во Брентвуд, Калифорнија.

Според окружниот обвинител на Лос Анџелес, Нејтан Хохман, Ник се товари за две точки за убиство од прв степен со употреба на „опасно и смртоносно оружје“ (нож), со отежнителна околност за повеќекратно убиство. Доколку биде прогласен за виновен, му се заканува доживотен затвор без право на условна слобода или егзекуција.

Семејната трагедија добива уште потажна димензија со оглед на тоа што Ник, кој работел како сценарист, со години се борел со зависност од дрога, тема која заедно со татко му ја обработија во биографскиот филм „Being Charlie“. Роб Рајнер зад себе остави богато филмско наследство, вклучувајќи ги класиците „Мизери“, „Принцезата невеста“ и „Неколкумина добри луѓе“.