Цената на нафтата скокна на 118 долари

Цените на нафтата експлодираа: барелот достигна 118 долари поради кризата на Блискиот Исток

Глобалните енергетски пазари се соочуваат со силен шок откако цената на суровата нафта достигна 118 долари за барел, што е највисоко ниво во последните неколку години. Скокот е директна последица од прекините во снабдувањето и намаленото производство на нафта во повеќе земји од Блискиот Исток.

Според податоците од пазарите, фјучерсите за американската сурова нафта WTI пораснале за повеќе од 30 проценти во еден момент од тргувањето, пред цената повторно да се стабилизира на нешто над 100 долари за барел.

Ормускиот теснец под притисок

Главната причина за растот на цените е нарушеното движење на танкерите низ Ормускиот теснец, една од најважните нафтени рути во светот.

Прекините во транспортот доведоа до намалување на производството во неколку големи производители на нафта, што веднаш се одрази на глобалните пазари.

Трамп: Ова е мала цена за безбедноста

Американскиот претседател Доналд Трамп изјави дека растот на цената на нафтата е „мала цена“ што треба да се плати за безбедноста и стабилноста.

Тој оцени дека цените ќе се стабилизираат кога ќе се елиминира иранската нуклеарна закана и кога ќе се нормализираат условите на пазарот.

Производството драстично опаѓа

Во Ирак производството од трите најголеми нафтени полиња се намалило за околу 70 проценти, од 4,3 милиони барели дневно на околу 1,3 милиони барели.

Истовремено, Кувајт започна со намалување на производството, а Катар минатата недела го намали производството на течен природен гас.

Можно поскапување до 150 долари

Енергетските аналитичари предупредуваат дека цената на нафтата може да достигне и 150 долари за барел доколку транспортот низ Ормускиот теснец не се нормализира во следните недели.

Дополнителен притисок врз пазарот може да дојде и од Саудиска Арабија и Обединетите Арапски Емирати, доколку тие исто така одлучат да го намалат производството поради нестабилноста во регионот.